Surah An-Nisa Ayahs #64 Translated in Khmer

តើអ្នកមិនឃើញទេឬចំពោះពួកដែលអះអាងថា ពួកគេបានជឿនឹងអ្វីដែលគេបានបញ្ចុះទៅអ្នក និងអ្វីដែលគេបានបញ្ចុះកាលពីសម័យមុនអ្នក? ពួកគេមានបំណងនាំគ្នាប្តឹងទៅគារវជន ឱ្យកាត់ក្តីក្នុងករណីដែលគេតម្រូវឱ្យពួកគេបោះបង់ជំនឿនឹងគារវជន។ ហើយស្ហៃតនចង់បំភាន់ពួកគេឱ្យវង្វេងដ៏សែនឆ្ងាយ

កាលណាគេបាននិយាយទៅកាន់ពួកគេថាសូមពួកអ្នកអញ្ជើញទៅកាន់អ្វីដែលអល់ឡោះបានបញ្ចុះមក និងទៅកាន់រ៉សូលអ្នកនឹងឃើញពួកពុតត្បុតបែរងាកអំពីអ្នកដោយរង្កៀស

តើដូចម្តេចទៅវិញកាលណាមានគ្រោះភ័យណាមួយបានត្រូវពួកគេដោយសារតែអ្វីដែលបាន ប្រព្រឹត្តដោយដៃពួកគេក្រោយមកពួកគេក៏បានមកជួបអ្នក ពួកគេស្បថនឹងអល់ឡោះថា ពួកយើងមិនចង់បានអ្វីក្រៅពីអំពើល្អនិងការត្រូវគ្នាឡើយ

ពួកទាំងនោះហើយ ដែលអល់ឡោះដឹងពីអ្វីដែលមានក្នុងចិត្តពួកគេហេតុនេះ ចូរអ្នកបែរចេញពីពួកគេ និងចូរអ្នកទូន្មានពួកគេ ហើយចូរអ្នកនិយាយទៅកាន់ពួកគេ នូវពាក្យសម្តីដែលមានប្រសិទ្ធភាពបំផុតនៅក្នុងខ្លួនរបស់ពួកគេ

រ៉សូលណាក៏ដោយ ដែលយើងបានបញ្ជូនគ្មានអ្វីក្រៅពីដើម្បីគេគោរពតាមដោយការអនុញ្ញាតពីអល់ឡោះនោះទេ។ ហើយក្នុងពេលដែលពួកគេបានសាងបាបកម្មចំពោះខ្លួនឯង បើសិនពួកគេបានមកជួបអ្នក រួចពួកគេបានសុំការប្រោសប្រណីអំពីអល់ឡោះហើយរ៉សូលក៏បានសុំការប្រោសប្រណីពួកគេដែរ ពួកគេពិតជាបានប្រទះឃើញថាអល់ឡោះជាអ្នកដែលទទួលការសោកស្តាយមេត្តាករុណាបំផុត