Surah An-Nisa Ayahs #34 Translated in Khmer

ជនដែលធ្វើដូច្នោះ ដោយបំពាន និងអយុត្តិធម៌យើងនឹងបញ្ចូលជននោះទៅនរក។ រឿងនេះលើអល់ឡោះជាការងាយបំផុត

បើពួកអ្នកចៀសវាង ពីបាបកម្មធំៗ ដែលគេហាមពួកអ្នក យើងនឹងលុបអំពីពួកអ្នក នូវកំហុសឆ្គងរបស់ពួកអ្នក ហើយយើងនឹងបញ្ចូលពួកអ្នកទៅកាន់ទីកន្លែងមួយដ៏ថ្លៃថ្នូរបំផុត

ចូរពួកអ្នកកុំនឹកមមៃចង់បានអ្វី ដែលអល់ឡោះបានប្រទានឱ្យអ្នកខ្លះលើសពីអ្នកខ្លះ។ ពួកបុរសត្រូវបានចំណែកមួយ​ នៃអ្វីដែលពួកគេរកបាន។ ពួកនារីត្រូវបានចំណែកមួយ នៃអ្វីដែលពួកនាងរកបាន។ ចូរពួកអ្នកសុំទៅអល់ឡោះនូវសេចក្តីមេត្តារបស់លោក។ ការពិតអល់ឡោះជាអ្នកដែលដឹងបំផុតពីអ្វីៗទាំងអស់

គ្រប់ៗគ្នាយើងបានចាត់ឱ្យមានអ្នកទទួលមរតក ពីអ្វីដែលបានបន្សល់ទុកដោយមាតាបិតា និង ញាតិជិត។ រីឯពួកដែលពួកអ្នកបានចុះកិច្ចសន្យារួចហើយ ចូរពួកអ្នកប្រគល់ជូនទៅពួកគេនូវចំណែករបស់ពួកគេ។ ជាការពិតណាស់ អល់ឡោះគឹជាអ្នកដែលសាក្សីនៅលើអ្វីៗទាំងអស់

បុរសគឺជាអ្នកទ្រទ្រង់ពួកនារី តាមតែអ្វីដែលអល់ឡោះបានប្រទានឱ្យពួកគេបានលើសខ្វះពីគ្នា និងតាមតែអ្វីដែលពួកគេបានទំនុកបម្រុងពីទ្រព្យសម្បត្តិខ្លះរបស់ពួកគេ។ នារីគុណធម៌ គឺជានារីដែលគោរពតាមឱវាទ ដែលថែរក្សាខ្លួនក្នុងពេលអវត្តមានប្តី តាមតែអ្វីដែលអល់ឡោះបានថែរក្សា។ រីឯនារីៗដែលពួកអ្នកបារម្ភ ពីការផិតរបស់ពួកនាង ចូរពួកអ្នកណែនាំ ពួកនាង ហើយឃ្លាតពីពួកនាងពីកន្លែងគេង ហើយចូរវាយពួកនាង។ ប្រសិនបើពួកនាងបានគោរពតាមពួកអ្នកហើយ ចូរពួកអ្នកកុំរកផ្លូវធ្វើទុក្ខពួកនាង។ ការពិតអល់ឡោះជាអ្នក ដែលឧត្តុង្គឧត្តម មហិមាក្រៃលែង