Surah An-Nisa Ayahs #36 Translated in Khmer

ចូរពួកអ្នកកុំនឹកមមៃចង់បានអ្វី ដែលអល់ឡោះបានប្រទានឱ្យអ្នកខ្លះលើសពីអ្នកខ្លះ។ ពួកបុរសត្រូវបានចំណែកមួយ​ នៃអ្វីដែលពួកគេរកបាន។ ពួកនារីត្រូវបានចំណែកមួយ នៃអ្វីដែលពួកនាងរកបាន។ ចូរពួកអ្នកសុំទៅអល់ឡោះនូវសេចក្តីមេត្តារបស់លោក។ ការពិតអល់ឡោះជាអ្នកដែលដឹងបំផុតពីអ្វីៗទាំងអស់

គ្រប់ៗគ្នាយើងបានចាត់ឱ្យមានអ្នកទទួលមរតក ពីអ្វីដែលបានបន្សល់ទុកដោយមាតាបិតា និង ញាតិជិត។ រីឯពួកដែលពួកអ្នកបានចុះកិច្ចសន្យារួចហើយ ចូរពួកអ្នកប្រគល់ជូនទៅពួកគេនូវចំណែករបស់ពួកគេ។ ជាការពិតណាស់ អល់ឡោះគឹជាអ្នកដែលសាក្សីនៅលើអ្វីៗទាំងអស់

បុរសគឺជាអ្នកទ្រទ្រង់ពួកនារី តាមតែអ្វីដែលអល់ឡោះបានប្រទានឱ្យពួកគេបានលើសខ្វះពីគ្នា និងតាមតែអ្វីដែលពួកគេបានទំនុកបម្រុងពីទ្រព្យសម្បត្តិខ្លះរបស់ពួកគេ។ នារីគុណធម៌ គឺជានារីដែលគោរពតាមឱវាទ ដែលថែរក្សាខ្លួនក្នុងពេលអវត្តមានប្តី តាមតែអ្វីដែលអល់ឡោះបានថែរក្សា។ រីឯនារីៗដែលពួកអ្នកបារម្ភ ពីការផិតរបស់ពួកនាង ចូរពួកអ្នកណែនាំ ពួកនាង ហើយឃ្លាតពីពួកនាងពីកន្លែងគេង ហើយចូរវាយពួកនាង។ ប្រសិនបើពួកនាងបានគោរពតាមពួកអ្នកហើយ ចូរពួកអ្នកកុំរកផ្លូវធ្វើទុក្ខពួកនាង។ ការពិតអល់ឡោះជាអ្នក ដែលឧត្តុង្គឧត្តម មហិមាក្រៃលែង

បើសិនពួកអ្នកបារម្ភពី ការបែកគ្នារវាងទាំងគេពីរនាក់ ចូរពួកអ្នកចាត់អាជ្ញាកណ្តាល ម្នាក់ពីគ្រួសារបុរស និងអាជ្ញាកណ្តាលម្នាក់ពីគ្រួសារនារី។ បើសិនគេទាំងពីរមានបំណងស្រុះស្រួល អល់ឡោះនឹងបង្កឱ្យ ត្រូវគ្នារវាងគេទាំងពីរ។ អល់ឡោះគឺពិតជាអ្នកដឹង ជាអ្នកអភិញ្ញាណបំផុត

ចូរពួកអ្នកគោរពប្រណិប័តន៍ចំពោះអល់ឡោះ ហើយចូរពួកអ្នកកុំស៊ីរិកនឹងលោកឱ្យសោះហើយ ចូរធ្វើល្អចំពោះមាតាបិតា អ្នកជិតខាងកុមារកំព្រា ជនក្រីក្រ ញាតិសន្តានជិត ញាតិសន្តានឆ្ងាយ គូកនជិត អ្នកដំណើរ និងទាសាទាសីដែលពួកអ្នកកាន់កាប់។ ពិតប្រាកដអល់ឡោះមិនស្រឡាញ់មនុស្សដែលវាយប្ញករើសអើងឡើយ